Ij 15 dë dzèmber a l'é 'l di 'd nassita 'd L.L. Zamenhof (1859-1917), ël creator ëd l'Esperanto, la Lenga Antërnassionala. Second l'inissiativa d'un djë scritor significativ ch'a l'han dovrà l'Esperanto, l'ungherèis, Julio Baghy (1891-1967), ij parlant d'Esperanto ant ël mond a festegio col di-lì 'dcò coma 'l di dla coltura an Esperanto. Con ël propòsit ëd fé crësse 'l nivel ëd la coltura dj'esperantista, Baghy a proponìa che 'l di dë Zamenhof a fussa 'dcò 'l di dël lìber an Esperanto.

Ij 15 dë dzèmber, dintra un event coltural ij grup locaj d'esperantista an vàire paìs a organiso d'event d'anformassion për ël pùblich general, an su la Lenga Antërnassionala ch'a l'é bondosa 'd literatura, tant originala che virà. Parèj a mosto al mond coma che 'l moviment esperantista a daga difusion a ij travaj colturaj 'd diverse etnie, e a daga la possibilità a përson-e d'àutre lenghe ëd gheudse ij travaj d'àutr pòpoj, an tramudand la diversità lenghistica con l'Esperanto.

Sossì a l'é sò contribù al di dë Zamenhof/di dël lìber, për sosten-e na comunicassion giusta e con ij midem drit për tuti, ch'a sia rispetosa an vers ij diversità ëd lenga e 'd coltura, an ësforsandse ëd continué a conservé cole richësse e coj drit.

Gavà l'organisassion ëd convegn, event, esposission e conferense an su l'inissiator ëd la Lenga Antërnassionala, Esperanto, L.L. Zamenhof, an col di-lì as celebro la coltura esperantista e la literatura esperantista fin-a con dle presentassion ëd neuve edission, vèndite 'd lìber e liture 'd neuv lìber. A-i é vàire òpere virà da n'original an esperanto, e d'àutre a son ant la lenga locala, virà da la version an esperanto ëd n'original an n'àutra lenga. L'esperanto a përmet d'avèj la pì fidela tradussion da ij test, e transpòrt ëd pensé, an fonsionand coma na lenga pont giusta antra doe lenghe étniche.

Piemontèis: Emanuele Regano

• Centro Esperanto di Torino "Giorgio Canuto" (Facebook)
• Gruppo Esperantista Vercellese "Mario Sola" (Facebook)
• Lenga esperanto - Wikipedia an lenga piemontèisa
• Federazione Esperantista Italiana (FEI)
• Itala Esperantista Junularo / Gioventù Esperantista Italiana (IEJ)