Më 15 dhjetor është ditëlindja e L.L.Zamenhofit (1859-1917), e krijuesit të Esperantos- Gjuhës ndërkombëtare. Me nismën e njërit nga shkrimtarët më në zë që e përdorin Esperanton, Julio Baghy-t (1891-1967), 15 dhjetori u quajt Dita e Zamenhofit dhe Dita e Librit në Esperanto. Më 15 Dhjetor, folësit e Esperantos në mbarë botën e festojnë këtë ditë edhe si ditë të Kulturës së Esperantos. Për të rritur nivelin kulturor të esperantistëve, Baghy propozoi që Dita e Esperantos të jetë edhe Ditë e Librit në Esperanto.

Më 15 dhjetor, grupet vendore të esperantistëve në vende të ndryshme organizojnë seanca informimi për publikun mbi gjuhën ndërkombëtare, mbi letërsinë e saj të bollshme, qoftë origjinale, qoftë të përkthyer. Kështu ata i tregojnë botës, se si lëvizja esperantiste i përhap veprat kulturore të etnive të ndryshme, duke mundësuar për folësit e gjuhëve të tjera shijimin e veprave të popujve të tjerë, duke e bartur ndryshimësinë gjuhësore nëpërmet Esperantos.

Kjo është ndihmesa e tyre në Ditën e Zamenhofit dhe Ditës së Librit, në mbështetje të komunikimit të drejtë, të barabartë, që respekton ndryshimësinë gjuhësore dhe kulturore, që synon ruajtjen e qendrueshme të pasurive dhe të drejtave të tyre.

Përveç mbajtjes së mbledhjeve, ekspozitave dhe ligjëratave për nismëtarin e Gjuhës Ndërkombëtare, L.L. Zamenhofin, atë ditë, kultura e Esperantos, letërsia e Esperantos festohen ndër të tjera me paraqitjen e botimeve të reja, me shitjen e librave dhe leximin e një libri të ri. Ka vepra në gjuhë të ndryshme, që janë përkthyer nga origjinali në Esperanto, të tjera kanë dalë në gjuhët vendore, të përkthyera nga versioni në Esperanto por nga një origjinal në një gjuhë tjetër. Esperanto na lejon të sigurojmë një përkthim sa më besnik të teksteve, transmetimin e mendimeve, duke funksionuar si një gjuhë e drejtë urë ndërmjet dy gjuhëve etnike.

Kujdestarët për Informimin në UEA (Organizata Botërore e Esperantos)

El esperanto en la albanan lingvon tradukis: Bardhyl Selimi